Baruu barsiisun akka hin gufanne hawaasni tumsa taasisuu qaba- Dr Tolaa Bariisoo

 Haalli nageenyaa Oromiyaa baruu barsiisuu akka hin gufachiisne hawaasni tumsa taasisuu akka qabu Biiron Barnoota Oromiyaa gaafate.

 

Hogganaan biirichaa Dooktar Tolaa Bariisoon haalli nageenya Oromiyaa dhiibbaa baruu fi barsiisuurraan ga’aa jiru ilaalchisee har’a ibsa laataniiru.

 

Qormaata guutuu biyyoolessaa bara darbee Oromiyaan kan kutaa 10tinis ta’e kan 12tin akka biyyaatti qabxii olaanaa galmeessisuudhan tokkoffaa akkuma turte, baransa sana irra deebi’uudhaf hojjetamaa jiraachuu Dooktar Tolaan eeraniiru.

 

Rakkoo nageenyaa godinoota tokko tokkotti mudatuun barnoonni ciccitaa turuu kaasaniiru.

 

Kun ammoo dhaloonni duubatti akka hafu kan taasisu waan ta’eef, ijoollen akka mana barnootaa deemtee nagayaan barattee galtu barnoonni tuttuqqii kamirraayyuu bilisa ta’ee akka itti fufu, hojii mootummaan hojjeturratti ummanni tumsa akka taasisu gaafataniiru.

 

Barana akka Oromiyaatti barattoonni miiliyoona 10tti siqan barnootarra jiraachuu ibsan Dooktar Tolaan.

 

Gaaffii ummataatin naannoo Beenishaanguul Guumz waliin hojii hojjetameen barsiistonni leenjifamanii manneen barnootaa 8 tajaajila baruu barsiisuu eegalaniiru.

 

Kan saddeettanii milkaa’us karoorri naannoo Oromiyaa fi Beenishaanguul Guumz manneen barnootaa 20 banuu akka ture hin haalle.

 

Jiraattonni godina Gujii Lixaa, Wallagga Lixaa, Wallagga Bahaa, Qeellam Wallaggaa, Horroo Guduruu Wallaggaa fi Booranaa ijoollee isaanii manneen barnootaatti erguu akka jajjabeessan Dooktar Tolaan gaafataniiru.

 

Godinaalee 6n kanneenitti torbee 2f manneen barnootaa 1,765 cufamaniit turan.

 

Lixa Oromiyaatti manneen barnootaa rakkoo nageenyatiin cufamanii turan 955 tumsa ummataatin banamaniiru jedhan Dooktar Tolaan.

 

Manneen barnootaa guyyoota 9f cufamanii turan kanneen amma kaleessatti tumsa ummataatin banamaniiru.

 

Godinaalee manneen barnootaa itti cufaman 5 dirmannaa hawaasaa, dhaabbilee siyaasaa fi tumsa qooda fudhataatin akka banamaniif waamichi dhiyaatera.

 

 Finfinnee, Muddee 23,2011(FBC)